今晚世杯外欧洲区G组赛事，荷兰于主场火并黑山。荷兰有老帅尹戈尔回朝改革，上轮打和挪威佢老人家已经唔多满意，加上荷兰喺呢组接连打硬仗，遇上缺少队长祖维迪嘅黑山，「橙军」主场必望先发制人，等班主力有得抖，直取半场主胜。
第3度执教荷兰嘅尹戈尔，对球员向来要求严谨，选兵唔讲名气以状态行先，可激发将士斗心。尹戈尔改踢4-3-3阵式，更适合荷兰球员发挥，久伤初愈嘅中坚华基尔云迪积克上场对挪威已经复出，中场拍档韦拿杜姆及法兰基迪庄亦攻守兼备，咪忘记进攻核心迪比状态火热，近8次为荷兰披甲轰入7球，依家重遇当年发掘佢嘅尹戈尔，师徒拍住上威力惊人。
祖维迪退队黑山打击大
G组目前形势紧凑，土耳其、荷兰、黑山同挪威4队只系相差1分，荷兰主场出击3分志在必得。事实上黑山虽然喺今届世杯外表现唔曳，但为球队攻入3球嘅王牌祖维迪因伤退队，冇咗呢位「发电机」兼数胡人物，对黑山打击甚大。
翻查纪录，荷兰近7场世杯外取得5胜1和1负，其中5次喺上半场取得领先优势，非常抢缰，今仗势必尽早锁定胜局，等班主力有休息机会，为下仗硬撼土耳其做准备；黑山防线早段唔多集中，近6场世杯外有5次先失波，上场对土耳其就喺30分钟内连失两球，半场主胜值博。
