欧国盃B组次轮赛事，上仗惨败嘅俄罗斯继续喺主场出击迎战芬兰，为夺出线权今仗不容再失。第一次参赛嘅芬兰首战爆冷击败丹麦，但全场一直处于捱打状态，若非门将哈迪基连番「神救」，未必可以保住胜局。俄罗斯实力无疑係喺芬兰之上，加上主场之利同非胜不可嘅决心，今仗主胜係信心之选。
俄罗斯上场面对冠军热门比利时惨吞3蛋，技不如人嘅结果并唔令人意外，不过球队剩低两场赛事就变得更加重要。俄罗斯今场有老将施哥夫小腿受伤缺阵，古斯耶耶夫亦因疑似脑震盪上阵成疑，不过二人都係防守球员，对于今场预计围攻芬兰嘅战局，影响相对较细。
俄罗斯中场核心高路云已进入状态，呢位「大脑」嘅长传、远射同死球威胁力，将会係撕破芬兰密集防线嘅重点球员。事实上，俄罗斯向来无惧芬兰死守，翻查两队对赛往绩，俄罗斯近4次面对芬兰录得全胜。
