為飯碗全力搶分
今日澳職獨腳戲，兩支近況曳爆球隊撞到正，西部聯繼續係中立場迎擊墨爾本勝利。雖然西部聯連輸5場後，出線季後賽只剩番數字上嘅機會，但教練魯丹賽前仍鼓勵球員要為前途而戰，反觀同樣5連敗嘅墨爾本勝利早已對今季抱放棄態度，為來季重建做准備，寧捧上盤。
西部聯數字上仍有機會爭入前6嘅季後賽席位，先決條件當然係自己爭氣，贏波全取3分。雖然佢哋狀態確係堅差，而且陣中老將偏多，包括迪亞文迪、貝利沙等體力一定冇咁好，加上賽程咁密好難場場踢足，因此連續5場聯賽輸曬；不過教練魯丹已下令無論能否殺入季後賽，球員都要為前途及飯碗搏盡。事實上，西部聯近年對賽專剋墨爾本勝利，近5次碰頭取得4勝1和，今場再遇有望延續優勢。
墨爾本勝利立立亂
墨爾本勝利今季早已進入放棄狀態，球隊早前已宣布新帥普波域於今季之後接手，不過看守教練堅恩日前竟然投訴，指普波域喺未知會佢嘅情況下，私自同球員商討下季去向，難免影響軍心。睇番勝利今季聯賽贏得4場咁大把，而且近5仗亦全部輸曬，若果單計客場，同樣錄得5連敗，明顯係等收咧，造訪剋星西部聯唔慌會搏，上盤值得捧場。
