今晚西甲快车尾场，巴塞隆拿作客「小蝙蝠」利云特。利云特依家高不成、低不就，状态又曳，今场例行公事唔慌会搏，巴塞仍有些微争标希望，必定趁机追打落水狗，以美斯为首嘅锋线火力全开，转捧3.5球嘅入球大更划算。
利云特季中表现神勇，两斗马德里体育会取得1胜1和，更一度缔造15场仅2败佳绩，係硬淨到晕嘅猪头骨。可惜自西盃出局后，即刻变咗洩气皮球，近10场输咗7仗，既无力争下届欧洲赛席位，护级压力亦唔大，正宗风流波，唔慌有战意喇，等放暑假信唔过。
美斯基沙文脚风顺
巴塞早前勇夺西盃，虽然日前联赛久攻不下，同马体会互交白卷再度失分，但争逐冠军仲未绝望，连盃赛在内，近10场取得7胜1和2负，而且主帅朗奴高文坐完波监可以督师，稳定军心，遇弱绝对係抢分良机。其中美斯伙拍基沙文愈战愈勇，巴塞近7场共入16粒，呢对拍档就佔咗12球，脚风奇顺，不过客W太热冇肉食，睇埋往绩，巴塞近5次联赛作客利云特，有4次总入球开4球或以上，3.5球大盘抵玩。
