今晚西甲尾场，3哥巴塞隆拿主场迎战基达菲。「地上最强」巴塞虽然勇夺西班牙盃，但进攻过于倚赖美斯，近期总係老鼠拉龟冇碇埋手；基达菲初段守得两嘴，半场和有分头值博。
巴塞于日前西班牙盃决赛以4比0大胜毕尔包，打破700多日锦标荒，今季起码有1隻奖盃落袋，美斯更省入两粒，成为首位7届决赛都有士哥嘅球员。
斋睇赛果好似赢得轻鬆，但睇番全部入波都喺下半场12分钟内攻入，上半场面对毕尔包嘅密集防守，呢支西甲劲旅其实冇乜板斧。巴塞倚赖美斯就係人都知，当呢位队长发挥唔顺嗰阵，进攻效率立即跌Watt，佢哋近3仗虽获2胜1负，但上半场全部食白果，唔单止对毕尔包下半场先发力，就连联赛赢华拉度列都係靠补时先入波奠胜，可见比赛初段例牌慢热。
顽强防守考起强队
于下游徘徊嘅基达菲最叻玩死守，佢哋近5仗联赛虽然未赢过，但当中4度打和仅失2粒，包括赛和皇马及马体会。基达菲深明若果先失波好难追得番，因此初段特别保守，尤其係客场，近7仗联赛作客，有6次开半场和，其中4次半场波胆为0比0，绝对係猪头骨唔易啃，加上基达菲联赛排名15位，仍未脱离降班危机，为抢分护级必定死守，预计今场巴塞初段未必咬得入佢哋，半场和不妨追多铺。
