今晚西甲头场亦有好戏码，1哥马德里体育会主场硬撼侯尔斯卡。马体会虽然上仗罕有地大胜，但只係对手太弱，不足为据，锋线冇咗苏亚雷斯压阵点都差啲；侯尔斯卡仍要为护级抢分，今仗一定摆铁桶阵抗敌，捧中位数2.5球嘅入球细最上算。
马体会上仗意外地大炒伊巴5比0，首先对手只係包尾大幡，今季联赛已失41粒，而且短时间连失两球后立即崩溃，因此马体会攻力复整嘅讲法不能作准。其次係冇咗苏亚雷斯同祖奥菲历斯，单计联赛佢哋共轰26球，佔咗全队入波接近一半，讲真佢哋受伤前，马体会已开始跌Watt，依家冇埋呢对拍档，主帅施蒙尼惟有将防中马高斯洛兰迪推前一格打前锋，虽然佢都交到货，上仗更加省入两粒，但只係权宜之计，依家马体会嘅攻击力始终靠唔住。
侯尔斯卡守得稳
作客嘅侯尔斯卡仍位处联赛下游，未计今轮，佢哋同降班区尾3嘅艾拉维斯同分，形势水深火热，抢分欲望不下于争标嘅马体会。睇番侯尔斯卡近4仗联赛取得2胜1和1负，其中3仗开2球或以下，状态唔曳。何况马体会最为人诟病嘅，正係破铁桶阵能力，佢哋近10场联赛只入13球，有8仗开2球或以下，若扣除上仗大胜嗰5粒，之前9仗联赛仅入8粒，以一支豪门球会嚟讲攻力坚曳，中位数2.5球嘅入球细乃不二之选。
